52-BLAU
iXA (Xián Martínez e Elena Castellanos)Xoves 7 de maio 18h
Cidade da Cultura | Museo Centro Gaiás, sala 1
52-BLAU é unha obra que xira ao redor da soidade acompañada, que muda e se transforma segundo a arquitectura do espazo. Cinco intérpretes nun intento de sobrevivir a un naufraxio na inmensidade dun espazo infinito, onde o individuo afoga no baleiro dun océano cheo de estímulos, persoas e información.
Case unha oda á adaptación no medio do trebón, onde un corpo bate coa soidade e trata de saír a flote.
52-BLAU habita a tristura nun contexto onde os corpos son incapaces de comunicarse. Unha mirada baixo a auga que só consegue observar o azul intenso do ceo, o mar e o infinito.
iXa
iXa nace como unha compañía de danza con identidade mixta entre Galicia, Euskadi e Navarra que ten como eixo artístico a creación escénica contemporánea pensada especificamente para públicos non especialistas, traballando con dramaturxias accesibles e elementos que conecten co imaxinario colectivo.
Entre os seus proxectos sobresaen Pioneiras//Aitzindariak, estreada en 2021 e cunha clara proxección internacional e Nik•Eu 2.0 (2024) e Ollos cara dentro (2023), peza curta para espazos non convencionais que recibiu un total de 13 premios nos certames e festivais máis importantes do estado español. iXa creou obras para outras plataformas como a EDCM de Montreal, A compañía DAB de Euskadi ou o CDAN de Lugo. Ademais foi convidada os centros de formación máis importantes do país como o Conservatorio Superior de Madrid e o Institut do Teatre para compartir a súa metodoloxía e repertorio cos futuros profesionais do sector.