Baunsbak
Elvi BalboaVenres 9 de maio 17h
Cidade da Cultura, Espazos exteriores
O corpo rebota, impúlsase, sobrecárgase. A enerxía medra ata o exceso e, nalgún punto, necesita recuperarse. BAUNSBAK é unha viaxe física entre a exaltación e o colapso, entre a inercia do movemento e a procura do equilibrio.
Coas jumping boots nos pés, cada impacto amplifícase, transformando o chan nun resoador vivo. O son, captado e distorsionado en tempo real, constrúe unha paisaxe vibrante onde a danza non só se ve, senón que se escoita e se sente. O corpo é impulsado constantemente, atrapado nunha dinámica de expansión e contracción, esixindo resistencia, adaptación e recuperación.
Oscilando entre o circular e o abrupto, entre o impulso e a fatiga, BAUNSBAK leva o corpo ao límite da súa propia enerxía, explorando o rebote como acción física e como metáfora da recuperación.
Punto de encontro: REGA 1 (ao carón do Museo Centro Gaiás).
Elvi Balboa
Elvi Balboa articula unha proposta artística na que o corpo emerxe como un territorio de exploración crítica e multisensorial. En diálogo coa música electrónica e a ciencia ficción, o seu traballo multidisciplinar desafía as nocións convencionais do movemento, integrando a arquitectura e as paisaxes sonoras que expanden os límites do son. Desde un enfoque instalativo, Balboa posiciona o corpo non só como un medio expresivo, senón como un axente de cuestionamento: un catalizador que tensiona a relación entre identidade, colectividade e contorna. As súas pezas convidan o espectador a unha experiencia profunda e inmersiva, onde cada movemento revela narrativas sobre pertenza e transformación.
Entre os seus proxectos máis recentes destacan AM I WHAT? (2020), NASENDA (2022), KNIFELIKE (2022, xunto a Ignacio Jiménez, seleccionado nas Residencias Paraíso) e ANÖA, co-producida polo Centro Coreográfico Galego (2024).