En coherencia coa aposta de Escenas do cambio por abrir a programación de artes vivas a procesos de participación comunitaria, desenvolverase un encontro de mediación artística vinculado á peza FEAR:LESS, da creadora Silke Z., coordinado por Julia Sueiro. FEAR:LESS sitúa o corpo nun lugar de exposición, risco e relación, onde a confianza, a escoita e a atención á outra persoa se converten en materiais centrais do proceso artístico. A combinación de creación, investigación e pedagoxía que atravesa a práctica de Silke Z., así como o seu interese por xerar espazos de encontro interxeracional e de intercambio con persoas non profesionais, conecta de maneira directa coa intención desta xornada intensiva de convivencia.

A proposta articúlase como unha experiencia de mediación e convivencia ao redor da creación contemporánea, combinando a participación nun taller, a asistencia á función e espazos compartidos de contextualización, diálogo e reflexión colectiva. Está dirixida a un grupo diverso de persoas adultas, con especial atención a persoas maiores que non frecuenta habitualmente a danza contemporánea. A selección das participantes realizouse en colaboración con entidades, colectivos e asociacións locais da contorna de Santiago de Compostela.

O obxectivo é facilitar unha aproximación accesible e situada á peza e aos seus procesos de creación, favorecendo o encontro en espazos compartidos entre comunidade, artistas e festival, e contribuíndo á creación e acompañamento de novos públicos dende a experiencia directa e a participación activa.