HORIZONTES ERRANTES
Laura Aris, Jakob Jautz, Jorge da RochaXoves 7 de maio 19:30h
Cidade da Cultura | Edificio CINC, Salón de convencións
Horizontes Errantes nace de dúas travesías a pé realizadas en xullo e setembro do 2025: de Tübingen a Freiburg (a través da Selva Negra, Alemaña) e desde o Val do Trubia (Asturias) ata Santiago de Compostela, seguindo o Camiño Primitivo.
Durante 14 días en cada territorio, Laura Aris e Jakob Jautz camiñaron atravesando paisaxes, recollendo as súas atmosferas e calidades, así como os encontros cos seus habitantes humanos e máis-que-humanos. Ao longo do percorrido, o intercambio espontáneo e xeneroso coas comunidades locais —agricultores, artistas, activistas, animais, plantas e a propia meteoroloxía do territorio— converteuse en parte esencial do proceso creativo e do pensamento ecolóxico e poético que inspira a obra.
A peza traduce esta experiencia á linguaxe do corpo, a danza, a música, a voz e a instalación. Unha proposta escénica que non fala sobre nós, pero que se move a través noso. Nun intento de prolongar a memoria do camiño e dar espazo ás voces que atopamos, os nosos corpos convértense en arquivo vivo dun pasado recente.
“We choose to remain hopeful” (Decidimos manter a esperanza) foi o mantra que acompañou o proceso. Cremos que imaxinar xuntos futuros esperanzadores é tamén unha forma de resistencia e compartilos, unha práctica de creación colectiva.
Nesta nova presentación en Santiago —destino final do viaxe— Horizontes Errantes volve activarse como xesto artístico, poético e colectivo.
NOTA: Ao remate de Horizontes Errantes, o Comando Dramatúrxico organiza, no mesmo espazo, unha conversa entre público e artistas na que compartir impresións e inquedanzas ao redor desta peregrinación artística e da súa inclusión na dramaturxia do festival.
Laura Aris é unha intérprete, coreógrafa e profesora de danza contemporánea amplamente coñecida polas súas habilidades interpretativas e polo seu labor pedagóxico internacional, cunha carreira que abrangue prestixiosas compañías de danza (Lanònima Imperial, Ultima Vez) e proxectos artísticos independentes. Actualmente desenvolve a súa práctica creativa desde Bélxica, combinando proxectos por encargo, actuacións en solitario e numerosas colaboracións con outros artistas. O seu interese é fomentar o diálogo continuo coa danza contemporánea, con outras disciplinas e tamén na relación entre intérpretes e o público.
Jakob Jautz estudou circo contemporáneo na Fontys-ACAPA dos Países Baixos e expandiu a súa formación na Salzburg Experimental Academy of Dance, completando en 2018 a mestría en danza e coreografía. O seu traballo céntrase na relación entre o mundo humano e o máis que humano, desenvolvendo tanto proxectos performativos (Traces, 2022; Horizontes Errantes, 2025) como de formación, a través da práctica da based landscape choreography (coreografía baseada na paisaxe). Tamén colabora coa Universidade de Tübingen en proxectos relacionados cos dereitos da Natureza, a relación home-natureza e o activismo sensible. É membro fundador do Performing Arts Collective de Tübingen e participa da residencia e espazo para eventos Station Circus.
Jorge da Rocha é un músico, compositor, produtor e cantante portugués con base en Barcelona, coñecido pola forma na que explora o son do contrabaixo, combinándoo con voces, guitarra eléctrica, percusión e live-looping. Logo de traballar e actuar en diferentes proxectos musicais na escena de Barcelona e Berlín, lanzou en 2016 a súa carreira en solitario cos álbums These Are a Few of My Favourite Songs (2016), To Drop and Let Go (2017), BLAU – Being Lost As Usual (2020) e Lartic Soundtracks Vol. 1 (2025). Ten actuado en escenarios de toda Europa, Asia e América Latina, e compón tamén bandas sonoras para cine, teatro e danza.