I’m not a hero
FluctusVenres 9 de maio 18.15h
Sábado 10 maio 18.30h
Cidade da Cultura, Galería de servizos
I’m not a hero aborda o tema do heroísmo e as súas manifestacións contemporáneas a través do teatro físico:
un público en círculo, dous corpos mesturándose, dúas historias rozándose, o conxunto afogando nun pozo de boas intencións.
Partindo do suposto de que ser heroe ou heroína hoxe en día consiste no acto de saír da propia zona de confort para actuar en situacións cotiás nas que o outro necesitaría axuda, Kevin Blaser e Faustino Blanchut —autores e intérpretes na escena— interróganse sobre cales son as forzas que actúan en sentido contrario. O título do espectáculo fai referencia á escusa detrás da cal un se agocha para non expoñerse, para non correr o risco de ser vulnerable e para xustificar a incapacidade de saír, ás veces, dunha pasividade que permite permanecer na comodidade e a calor do anonimato.
Punto de encontro: REGA 1 (ao carón do Museo Centro Gaiás). Acceso á Galería de Servizos polo Xardín literario.
Fluctus
Creada en 2018 por Kevin Blaser, Fluctus é unha compañía que tira dos núcleos máis crus do teatro, do movemento e da performance para poñer en escena as súas obras.
Despois de varios anos de colaboracións artísticas, en 2022 Faustino Blanchut únese a Kevin Blaser como codirector artístico da compañía, dando forza a unha visión artística con horizontes comúns.
Xuntos, os dous artistas exploran novas formas de expresión teatral orientadas ao contemporáneo, co obxectivo de experimentar sen se converter en creadores para unha elite.
A compañía ten unha presenza sólida no territorio suízo, e o seu traballo xa creou interese internacional, con representacións en Italia, España e Francia, demostrando capacidade para superar fronteiras lingüísticas e culturais.