Worn Out
Chumpan YamooXoves 8 de maio 21.15h
Santiago de Compostela, Salón Teatro
A miña capacidade de percibir as cousas en movemento esgótase antes de decatarme.
Non son quen de comunicarme con elas, o que provoca disfuncións e malentendidos.
A medida que a miña percepción do movemento se desgasta,
vou creando unha relación coas cousas inmóbiles.
Comezo a parecerme a elas.
«O proceso de asemellarse a través do desgaste».
Acollo este desgaste.
Conversa posterior ao espectáculo
Ao remate da representación, iniciaremos no propio Salón Teatro unha conversa co público moderada polo Comando Dramatúrxico ao redor da proposta que nos ofrece Baesub Keum. Non é todos os días que temos a oportunidade de establecer un diálogo directo cun artista que vén dun ecosistema cultural tan afastado como o de Corea do Sur.
Trátase de conectar e de dar liberdade aos latexos do público ao redor da obra, de escoitar, falar e compartir para intentar saber, por exemplo, por que “a capacidade de percibir as cousas en movemento se esgota antes de que nos decatemos”, e como traballa o “concepto creativo de separación” a compañía Chumpan Yamoo nas súas creacións.
Chumpan Yamoo
Fundada en 2009 en Corea, desde entón, a relación entre os seres humanos é o seu foco de acción. A estrea de As for Me en 2019 marcou un punto de inflexión para o grupo, que a partir dese momento desenvolveu a súa propia metodoloxía do «concepto creativo de separación», que busca desmantelar as obras mediante a separación e perseguir a creación de pezas con espazos en branco. Considera que así o público terá máis liberdade para imaxinar e interpretar, precisamente no momento en que xorde o espazo baleiro.
Entre as súas obras destacadas de danza en solitario atópanse Lunatic seesaw, Island, Are you really Human, Hug, Question mark e Worn Out. Destacan tamén as súas producións para danza en grupo In Between, Work, Because of The Liver, As for Me, About Being Seen e Zebra Crossing.
Chumpan Yamoo recibiu, entre outros galardóns, o premio á excelencia no festival internacional de danza de Busan AK21 (2016), o premio Dong-A de Teatro (nos anos 2020 e 2015), o Dance Vision Award outorgado por The Contemporary Dance Promotion of Korea (2021) e o Dance Arts Award da revista de danza Momm no mesmo ano. O seu traballo foi recoñecido tamén en dúas ocasión nos premios que concede a Asociación coreana de Críticos de Danza.