Un director de teatro e un cineasta xúntanse para realizar unha película sobre a formación de actores. O resultado, unha ficción onde os “estudantes” son nenos e nenas de entre 8 e 12 anos e onde dous profesores de teatro aplican dous métodos case contrarios, como se realmente fose posible crear un adestramento elemental para actores. Pero é posible? É posible formar por dentro e por fóra, saírse do corpo, transformarse? “Facer de outro non é calquera cousa”, conclúe un dos personaxes.
Federico León (Buenos Aires, 1975). En teatro escribiu e dirixiu Cachetazo de campo, Museo Miguel Ángel Boezzio, Mil quinientos metros sobre el nivel de Jack, El adolescente, Yo en el Futuro, Las Multitudes e Las ideas. Escribiu, dirixiu e actuou na súa primeira película, Todo juntos. En 2007 escribiu e dirixiu xunto a Marcos Martínez, a súa segunda película: Estrellas. En 2009, xunto a Martín Rejtman, escribiu e dirixiu Entrenamiento elemental para actores. En 2014 realizou La última película, unha serie de intervencións en ex cines transformados en estacionamentos de coches. Polo seu traballo obtivo diversas distincións: Primeiro Premio de Dramaturxia do Instituto Nacional de Teatro, Premio Konex 2004 en letras pola produción do quinquenio, Fondo Nacional de las Artes, Primeiro Premio Nacional de Dramaturxia 1996-1999, entre outras.