A compañía Kirenia Danza presenta Afectos, a terceira entrega da súa triloxía coreográfica Os vulnerables. Esta tríade de producións enfócase no impacto da pandemia da COVID-19 nas persoas migrantes e na súa rede de afectos. A compañía demostrou o seu compromiso con este tema ao longo de dúas producións previas: E-migrantas en 2020 e Primeiro a vida! no 2021, que abordaron a necesidade dun cambio no modelo actual de xestión das crises sociais. Nos últimos anos, a pandemia puxo de manifesto a importancia de protexer os dereitos fundamentais das persoas migrantes e desprazadas, sexa por motivos económicos, crises climáticas, persecucións por motivos políticos, étnicos ou de tendencia sexual, conflitos ou outras causas. Moitas persoas, incluídas as artistas de danza, víronse afectadas durante a crise da COVID-19 e precisaron axuda. A obra Afectos sitúanos ante unha reflexión alegórica do patrimonio humano da migración, como son o Camiño de Santiago en Galicia, o Kumano Kodo en Xapón, os corredores humanitarios de Ucraína, ou as novas rutas de emigración centroamericana. Afectos é unha homenaxe á complexidade das emocións humanas e unha invitación a conectarse co noso propio ser emocional. Un convite ás audiencias a reflexionar sobre a importancia da solidariedade en tempos difíciles.
Kenia Espiñeira
FICHAS POLICIAIS (fai clic en cada imaxe para descargar)
Kirenia Danza
Kirenia Danza é unha compañía galega de danza, fundada en 2019 por Kirenia Martínez Acosta, coreógrafa, bailarina e actriz, quen co-dirixe paralelamente a Cía. Entremáns desde 2006. O traballo de creación coreográfica de Kirenia Danza busca unha liberdade nas imaxes e os xestos para que actúen como “cartas de presentación” dos sentimentos e emocións, a buscar que estas resoen no corpo e a corporalidade das intérpretes. O seu método creador resúmese na magnitude coreográfica do impromptu e a itinerancia (o improvisado, o emerxente), a determinar unha linguaxe coreográfica singular, onírica, poética, onde as intérpretes toman un papel definitivo sobre as accións, as palabras, o pensamento, a fluír ata chegar ao concepto do discurso exposto.
Actualmente combina as creacións propias con encargos coreográficos, colaboracións cinematográficas, literarias e proxectos formativos e de cooperación europea con outras entidades no nivel internacional, entre as que sobresaen: E-migrantas, primeira parte da triloxía Vulnerables; Instante Gradual, seleccionada na primeira convocatoria de Mobilidade Europea I-Portunus; Vagaface, Brumalión e o Can de Pedra, baseada nun conto inédito de Uxío Novoneyra e estreada no Teatro Aeroplio de Atenas; Otero, la bailarina española, proxecto de investigación coreográfica gañador do primeiro concurso do I Laboratorio coreográfico da SGAE, Tres tristes 2.0 e Primeiro a vida!, segunda entrega da triloxía Vulnerables, estreada o 23 de abril 2021.
