ONE NIGHT AT THE GOLDEN BAR é unha declaración de amor cursi e musicada desde unha mirada queer; a procura dun estado de vulnerabilidade que poña en evidencia o poder dos afectos e a beleza que se esconde na fraxilidade. Desde o imaxinario da figura celestial do anxo atravésase unha choiva de cuestións: que masculinidade nos goberna, que fraxilidades e gretas non se están mencionando, que identidades están nun lugar vulnerable e monstruoso ao mesmo tempo, como cantar ao amor desfasado, ao amor infinito, politicamente incorrecto, insurrecto, sacrificado. Como imos protexer a estes corpos e identidades cando griten publicamente como senten cando aman; poida que agora sexa o momento de contraatacar. Hai unha forza en todo o extremadamente fráxil, como dixo Rilke “todo anxo é terrible” e como dixo Ana Torroja en La fuerza del destino: “unha noite no bar do ouro decidín atacar”. Este é o ataque do bar do ouro, unha abordaxe.
Alberto Cortés
Alberto Cortés (Málaga, 1983). Director de escena, dramaturgo e performer das súas propias derivas. Licénciase na ESAD de Málaga en Dirección de escena e dramaturxia e en Historia da arte na UMA. En 2009 comeza o seu camiño escénico desde unha dramaturxia bastarda e periférica que se foi facendo máis salvaxe co paso do tempo. Non deixou desde entón de bater con diversas creadoras e amigas que inspiraron o seu camiño, e de xerar pezas de distintos formatos e disciplinas, nun intento de seguir tendo esperanza no intanxible e no humano. O seu traballo desenvolveuse ao longo dos anos a través de pezas de teatro, danza, performance e tamén folclore, flamenco ou site-specifics; acompaña procesos doutras creadoras desde a dirección e a dramaturxia, e imparte obradoiros a modo de encontros onde comparte as investigacións que atravesa. Ultimamente o seu camiño detívose na idea de entender o escenario como o espazo do desexo e na relación romántica co espectador. En 2022 publica Los montes son tuyos coa editorial Continta me tienes, que recolle os textos das súas dúas últimas pezas, El Ardor e One night at the golden bar. A día de hoxe habita a súa identidade sendo creador, performer, director, dramaturgo, acompañante, docente, fillo, irmán, tío, amante, amiga. www.comoseralbertocortes.com
