Benvidas ao casting para o papel de Grace, a protagonista da non-película Washington de Lars Von Trier. Despois de Dogville (2003) e Manderlay (2005), Washington tiña que pechar o tríptico de Von Trier sobre a debilidade humana, pero nunca pasou de ser un borrador. A película existe tan só como posibilidade, como potencia.
Máis aló do guión, a proposta enlaza neste sentido con aquilo que interesaba a Von Trier dos mecanismos da ficción: cuestionar un sistema que debuxa os límites do real e o normativo cun rotulador demasiado groso. As súas películas propoñen preguntas sobre que pode ser “verdade”, tanto diante como detrás da cámara —e que non—.
Matías Daporta
Artista multidisciplinar, xestor cultural e comisario. O seu último traballo, #spanishwashing, é un proxecto de investigación realizado entre xuño de 2016 e febreiro de 2020 sobre as estratexias de homoxeneización cultural actuais, composto de pezas de diversos formatos que se foron dando a coñecer no museo A Neomudejar, AADK Murcia, Cumplicidades de Lisboa, ARC en Suíza, NAVE en Santiago de Chile e a galería UVE en Buenos Aires, e impartindo un taller de dez días en NIÑO, Uruguai.
Ademais, é o comisario do festival de artes vivas e internet Gústasme Pixelad_ en LaCasaEncendida (Madrid) e co-dirixiu LaJUANGallery xunto a Juan Gómez Alemán ata principios do 2018. Creou a iniciativa Annonymous Museum for Unsigned Works, en Ámsterdam, onde se ofrece un espazo seguro para aquelas artistas cuxas obras expoñen riscos sociais e políticos cara ás súas persoas. É tamén un dos fundadores do festival de danza Corpo(a)Terra en Ourense.
Outros traballos artísticos seus foron presentados en contextos internacionais como Veem, Arti et Amicitiae, Corridor Space Project e Frascati Theatre (Ámsterdam); Projection room en Bruxelas; Oxo Tower en Londres, Centre of Mental and Physical Well-being de Bristol; A Casa do Povo en São Paulo; e a Sala Gaivotas, Espaço Comercio, Teatro Ibérico e Sala Trindade en Lisboa. Recibiu apoios de AFK da Cidade de Ámsterdam, AGADIC en Galicia, axuda a produción da cidade de Madrid, INJUVE e bolsas PICE á mobilidade.
